පහුගිය දවස් වල පැට්‍රොල් ෂෙඩ් එකට ගියහම නෝනාගෙන් හරිම බර බරේ.
150, 200 වගේ ගණන් වලට පැට්‍රොල් ගහන්න එපා කියලා. ලීටර් වලින් ගහන්න කියලා.
ඇයි වදේ රු.115ක් දීලා කොහොමද මගේ පරණ සීටී සීය ගොයියාට ලීටර් එකක් ගහපන් මල්ලි කියලා අපේ අම්මාව ඒ සහෝදරයාට සිහිකරවන්නේ.
කොහෙද නෝනා එක්ක බැහැ.
එයා කියන්නේ අර ඇමරිකාවෙද කොහෙද බැංකු සේවකයෙක්, පොළි මුදල් වල - උදාහරණයක් හැටියට ඩොලර් 10.5467875377575 - අවසාන දශමස්ථාන ටික එකතු කරන් කෝටි පතියෙක් වුනා වගේ අපි ලීටර් වලින් තෙල් ගත්තේ නැත්තං මේ ෂෙඩ් ගොයියෝ තෙල් පතියෝ වෙයිලු.
ඒ කථාවෙත් ඇත්තක් නැත්තෙත් නැහැ ඉතිං. ඒත් ඉතිං ඉස්සෙල්ලා කිව්වා වගේ රු.115, රු. 230ක් වගේ ගාණක් දික් කරන්න මට නිකං මොකද්ද වගේ. කොහෙද මේ නෝනාලා අපේ අභිමානය සතේකට මායිම් කරන එකක් යෑ.
අනේ දෙවියෝ මගේ මූණ බැලුවේ මේ ප්‍රශ්නෙන් මං තැලී පෙලී පොඩිවී මිරිකී ඉන්න වෙලාවේ. දෙයියනේ කියලා ලීටරේ රු.125ක් කලානේ. මට දැන් සුද්දා වගේ රු.250 දීලා ලීටර් දෙකක්ම ගහගන්න පුළුවන්. නෝනාගේ ප්‍රශ්නෙත් විසඳුනා. මගේ ප්‍රශ්නෙත් විසඳුනා.
තෙල් මිල වැඩි කරපු උත්තමයන්ට පිං අයිති වේවා!!!
මේ අපේ කථාව පෙළ ගැස්සුවේ: අපේ මහත්තයා
මේ අපේ කථාව පෙළ ගැස්සුවේ: අපේ මහත්තයා
0 comments:
Post a Comment
අපේ කථාව ගැන ඔබේ කථාව